திருநெல்வேலியில் நடைபெற்ற விகாஸ் ராக்கெட் இயந்திர சோதனை வெற்றி !

திருநெல்வேலியில் நடைபெற்ற சோதனை

அதிக எடை கொண்ட செயற்கைக் கோள்களையும் விண்ணுக்கு எடுத்துச் செல்லும் வகையில் விகாஸ் இயந்திரத்தை மேம்படுத்துவதற்கு ஏற்ப ஆய்வுகள் நடைபெற்று வந்தன. தற்போது ஆய்வுப் பணிகள் முடிந்து அதிக உந்துசக்தி கொண்ட விகாஸ் ராக்கெட் இயந்திரம் வெற்றிகரமாகச் சோதித்துப் பார்க்கப்பட்டுள்ளதாக இந்திய விண்வெளி ஆய்வுக் கழகம் அறிவித்துள்ளது.

ராக்கெட் இயந்திரம்

ஏவு வாகனங்கள் அதிக எடையைச் சுமந்து செல்ல இந்த ராக்கெட் இயந்திரம் உதவும். விண்வெளி விஞ்ஞானிகளால் இந்தச் சோதனை 195 விநாடிகளுக்கு நடத்தப்பட்டது. தமிழ்நாட்டில் உள்ள திருநெல்வேலி மாவட்டம், மகேந்திரகிரியில் அமைந்துள்ள இந்திய விண்வெளி ஆய்வுக் கழக உந்துவிசை வளாகத்தில் (ISRO Propulsion Complex (IPRC)) இச் சோதனை நடத்தப்பட்டது.

அதிக உந்துவிசையுடன் விகாஸ்

இந்திய விண்வெளி ஆய்வுக் கழகத்தின் இரண்டாம் கட்ட துருவ செயற்கைக் கோள் ஏவு வாகனத்தின் ஆற்றலை அதிகப்படுத்த இந்த விகாஸ் இயந்திரம் உதவும். இதனைப் போலவே, புவி சுற்றுவட்ட செயற்கைக் கோள் ஏவு வாகனத்தின் ஆற்றலை அதிகப்படுத்தவும் (GSLV) இது உதவும். GSLV Mk-III வாகனத்தின் இரட்டை இயந்திரத் திறனை அதிகப்படுத்தவும் விகாஸ் உதவும். "மகேந்திரகிரியில் உள்ள உந்துவிசை ஆய்வு வளாகத்தில் (IPRC) அதிக உந்துவிசை கொண்ட மேம்படுத்தப்பட்ட விகாஸ் ராக்கெட் இயந்திரத்தின் சோதனை 195 விநாடிகளுக்கு நடத்தப்பட்டது" என இந்திய விண்வெளி ஆய்வுக் கழகம் கூறியுள்ளது.

சோதனை முழு வெற்றி

உந்து விசைக்கான அளவீடுகள் மிகச் சரியான முறையில் இருந்ததாக விகாஸ் சோதனையின் போது கண்டறியப்பட்டது. ஆய்வின் போது கவனத்தில் கொள்ளப்பட்ட அனுமானங்களை பூர்த்தி செய்யும் வகையிலும் சோதனையின் முடிவுகள் இருந்ததாகக் கூறப்படுகிறது. இந்திய விண்வெளி ஆய்வுக் கழகத்தின் புவிச்சுற்று வட்ட செயற்கைக் கோள் ஏவு வாகனத்தின் அடுத்த கட்ட வளர்ச்சியான GSLV Mk-III வாகனத்தில் பயன்படுத்துவதற்கு ஏற்ற வகையில் விகாஸ் உள்ளதாக சோதனையின் போது கண்டறியப்பட்டுள்ளது.