Super Flower Moon 2020: இந்த ஆண்டின் இறுதி சூப்பர் மூன் நிகழ்வைக் காண லாஸ்ட் சான்ஸ்!

சூப்பர் ஃப்ளவர் மூன் காண ஒரு வாய்ப்பு

சூப்பர் மூன் நிகழ்வை காண ஆர்வமாக இருக்கும் மக்களுக்கு வரும் மே 7 ஆம் தேதி, சூப்பர் ஃப்ளவர் மூன் காண ஒரு வாய்ப்புள்ளது. சூப்பர் ஃப்ளவர் மூன் குறிப்பாக வசந்தம் முழுமையாகப் பூக்கும் நேரத்தில் தோன்றும் என்பதால் இந்த நிகழ்விற்கு இப்படிப் பெயரிடப்பட்டுள்ளது என்று தெரிவிக்கப்பட்டுள்ளது. அதேபோல், இந்த சூப்பர் மூன் நிகழ்விற்கு வேறு சில பெயர்களும் உள்ளது.

இந்த ஆண்டின் இறுதி சூப்பர் மூன்

இந்த ஆண்டின் இறுதி சூப்பர் மூன் நிகழ்விற்கு முழு சோளம் நடவு நிலவு (Full Corn Planting Moon) மற்றும் முழு பால் நிலவு (Full Milk Moon) என்றும் அழைக்கப்படுகிறது. சூப்பர்மூனின் நிகழ்வு முழு நிலவு பெரிஜியுடன் (perigee) ஒப்பிடப்படுகிறது. நிலவின் நீள்வட்ட சுற்றுப்பாதையில் பூமிக்கு மிக நெருக்கமான புள்ளி பெரிஜி என்று அழைக்கப்படுகிறது. இந்த பகுதியை நிலவு நெருங்கும் நேரத்தில் வழக்கத்தை விட பெரியதாகத் தோன்றி சூப்பர் மூன் நிகழ்வாக உருவம் எடுக்கிறது.

இதை தவறவிட்டால் அடுத்த சூப்பர் மூன் நிகழ்வு எப்பொழுது?

இந்த 2020 ஆம் ஆண்டு, ஏற்கனவே இரண்டு சூப்பர்மூன்களைக் கண்டுவிட்டது என்பது குறிப்பிடத்தக்கது. இந்த ஆண்டின் மார்ச் மாதத்தில் வார்ம் மூன் தோன்றியது. அதேபோல், கடந்த ஏப்ரல் மாதத்தில் சூப்பர் பிங்க் மூன் தோன்றியது. இந்த ஆண்டின் இறுதி சூப்பர் மூன் நிகழ்வாக இந்த சூப்பர் ஃப்ளவர் மூன் தோன்றுகிறது. இதற்குப் பின் சூப்பர் மூன் நிகழ்வு அடுத்த ஆண்டு ஏப்ரல் 2021 இல் மட்டுமே தெரியும் என்று அறிவிக்கப்பட்டுள்ளது.

பூமியிலிருந்து நீண்ட தொலைவில் தோன்றும் சூப்பர் மூன் இது

சூப்பர் ஃப்ளவர் மூன் நிகழ்வை மற்ற இரண்டு சூப்பர் மூன் நிகழ்வுடன் ஒப்பிட்டுப் பார்க்கும் போது இதன் தோற்றம் மற்ற சூப்பர் மூன் தோற்றத்தை விட சிறியதாக இருக்கும் என்று தெரிவிக்கப்பட்டுள்ளது. இதற்குக் காரணமாக இது பூமியிலிருந்து நீண்ட தொலைவில் தோன்றுகிறது என்று கூறப்பட்டுள்ளது. பூமியிலிருந்து தூரத்தில் இந்த நிகழ்வு தோன்றுவதால் மற்ற இரண்டு சூப்பர் மூனை போல் இது பெரியதாக இருக்காது ஆனால், பிரகாசமாக இருக்கும்.

சூப்பர் ஃப்ளவர் மூன் நிகழ்வை எந்த நேரத்தில் பார்க்கலாம்

நாசாவின் கூற்றுப்படி, சூப்பர் ஃப்ளவர் மூன் மே 7ம் தேதி அன்று மாலை 04:15 மணிக்கு அதன் உச்ச வெளிச்சத்தை எட்டியிருக்கும் என்று தெரிவிக்கப்பட்டுள்ளது. இந்த குறிப்பிட்ட நேரத்தில், சந்திரன் பூமியிலிருந்து சுமார் 361,184 கிலோமீட்டர் தொலைவில் இருக்கும் என்று நாசா தெரிவித்துள்ளது. இந்த நிகழ்வைக் காணச் சிறந்த நேரமாக நிலவொளி உதயம் மற்றும் நிலவொளி மறையும் நேரம் இருக்கும் என்று தெரிவிக்கப்பட்டுள்ளது.

சந்திரனின் மேற்பரப்பை காண வாய்ப்பு

இந்த வாரம் பௌர்ணமியின் இரவுக்கு முன்னும் பின்னும் சந்திரனின் மேற்பரப்பில் உள்ள பள்ளங்களைக் கூட மக்கள் காணச் சிறந்த வாய்ப்புள்ளது என்று தெரிவிக்கப்பட்டுள்ளது. இந்த ஆண்டின் மிக பிரகாசமான சூப்பர் மூன் நிகழ்வு இது என்பதால், நிலவின் மேற்பரப்பை காணவும் வாய்ப்புள்ளது என்று நாசா தெரிவித்துள்ளது.

நிலவின் மேற்பரப்பை எப்படி காண்பது?

நிலவில் உள்ள கோப்பர்நிக்கஸ், டைகோ போன்ற பள்ளங்கள் மற்றும் நிலவின் ட்ராங்குவாலிட்டி கடல் மற்றும் அப்பல்லோ 11 இன் தரையிறங்கும் இடம் போன்ற இடங்களைத் தொலைநோக்கியின் உதவியுடன் அல்லது அடிப்படை உருப்பெருக்கம் கொண்ட தொலைநோக்கி மூலம் காணலாம் என்று அறிவிக்கப்பட்டுள்ளது. முடிந்தால் முயற்சி செய்து இதையும் பாருங்கள்.