பெண்ணின் காதில் வெடித்து சிதறிய TWS இயர்பட்ஸ்.. எந்த பிராண்ட்? என்ன கோளாறு? உங்கட்ட TWS Earbuds இருக்கா?

உங்கள் ஸ்மார்ட்போன் உடன் ட்ரூலி வயர்லெஸ் இயர்பட்ஸ் (Wireless Earbuds) சாதனங்களை இணைத்துள்ளீர்களா? உங்கள் காதில் பெரும்பாலான நேரம் இயர்பட்ஸ் போன்ற சாதனங்களால் மூடப்பட்டுள்ளதா? அப்படியானால், இந்த பதிவு முழுக்க முழுக்க உங்களுக்கானது தான். சமீபத்தில், துருக்கியை சேர்ந்த ஒரு பெண்ணின் காதில் இயர்பட்ஸ் வெடித்து, அந்த பெண் கேட்கும் திறனை இழந்துள்ள சம்பவம், உலகளவில் பெரும் அச்சுறுத்தலை உருவாக்கியுள்ளது. இவர் காதில் வெடித்த இயர்பட்ஸ் சாதனம், உலக தலைசிறந்த பிராண்டட் தயாரிப்பு என்பது குறிப்பிடத்தக்கது. அது எந்த நிறுவனத்தின் சாதனம்? என்ன காரணத்தால் இயர்பட்ஸ் வெடித்தது? என்ற முழுவிபரம் இங்கே.

உலகளாவிய TWS இயர்பட்ஸ் பயனர்களை அச்சுறுத்தும் சமீபத்திய நிகழ்வில், துருக்கியை சேர்ந்த ஒரு பெண் தனது சாம்சங் கேலக்ஸி பட்ஸ் எஃப்இ இயர்பட்ஸ் (Samsung Galaxy Buds FE) சாதனத்தை வழக்கம் போல பயன்படுத்தி இருக்கிறார். ஆனால், எதிர்பாராத விதமாக அந்த இயர்பட்ஸ் அவர் காதில் இயங்கிக்கொண்டிருக்கும் வேளையிலேயே வெடித்து சிதறியுள்ளது. வெடித்ததில் கடுமையான காயம் அடைந்ததால் கேட்கும் திறனை அந்த பெண் இழந்திருக்கிறார்.

பெண்ணின் காதில் வெடித்து சிதறிய TWS இயர்பட்ஸ்.. எந்த பிராண்ட்? என்ன கோளாறு?

அவரது துணைவர் சாம்சங் துருக்கி சமூக மன்றத்தில் பகிர்ந்த இந்த சம்பவம், வயர்லெஸ் இயர்பட்ஸ் சுற்றியுள்ள அதிகரித்து வரும் பாதுகாப்பு கவலைகளை எடுத்துக்காட்டுகிறது. ஃபோன் அழைப்புகள் செய்வது மற்றும் பொழுதுபோக்கு அனுபவிப்பது போன்ற தினசரி நடவடிக்கைகளில் அவற்றின் வசதி மற்றும் அதிகரிக்கும் ஒருங்கிணைப்பு இருந்தபோதிலும், இந்த சம்பவம் சாத்தியமான ஆபத்துகளை முன்னிலைப்படுத்துகிறது.

சமூக ஊடகங்களில் இந்த செய்தி வேகமாக காட்டு தீப்போல பரவ துவங்கியது. இந்த சம்பவத்தால், Samsung பயனர்கள், வாடிக்கையாளர் பாதுகாப்பை உறுதிப்படுத்தும் வகையில் கடுமையான நடவடிக்கைகளை நிறுவனம் எடுக்க வேண்டும் என்று கோரும் பல பதிவுகள் சாம்சங்குக்கு எதிராக விமர்சன அலை இணையதளத்தில் உருவாக்கியுள்ளது. இந்த சம்பவம் இயர்பட்ஸ் பயனர்கள் மத்தியில் புது பயத்தை உருவாக்கியுள்ளது.

ஸ்மார்ட்போன்கள், பவர் பேங்க், இயர்பட்ஸ் மற்றும் பிற கேட்ஜெட் கருவிகளில் பயன்படுத்தப்படும் லித்தியம்-அயன் பேட்டரிகளின் உள்ளார்ந்த ஆபத்துகளை மட்டுமல்லாமல், அத்தகைய சாதனங்களின் தரக் கட்டுப்பாடு மற்றும் பாதுகாப்பு தரநிலைகள் குறித்த கேள்விகளையும் இப்போது எழுப்பியுள்ளது. இந்த விவகாரத்தில் சாம்சங்கின் விசாரணை வெடிப்புக்கு வழிவகுத்த தெளிவான காரணம் எதுவும் கண்டறியப்படவில்லை என்று முடிவு தெரிவித்துள்ளது. இருப்பினும், சாம்சங் நிறுவனம் இதை பெரியளவில் பொறுப்பேற்கவில்லை என்று குற்றம் சாட்டப்பட்டுள்ளது.

உங்கள் இயர்பட்ஸ் இல் இந்த அறிகுறிகளை கண்டால் கவனம் தேவை.. பயன்படுத்தாமல் இருப்பது பாதுகாப்பானது:

சேதமடைந்த இயர்பட்ஸை சாம்சங் நிறுவனம் மாற்றி தருவதாக தெரிவித்தபோதிலும், வயர்லெஸ் இயர்பட்ஸின் ஒட்டுமொத்த பாதுகாப்பு குறித்த கவலைகளைத் தணிக்க நிறுவனம் எந்தவொரு அறிவிப்பையும் வெளியிடவில்லை என்று கூறப்பட்டுள்ளது. இருப்பினும், இந்த சாதனம் வெடித்ததற்கு ஓவர் ஹீட்டிங் சிக்கல் ஒரு வாய்ப்பாக இருக்கலாம் என்று கருதப்படுகிறது. பயனர்கள் தங்கள் சாதனங்களில் அதிக வெப்பமடைவதற்கான அறிகுறிகளுக்கு எச்சரிக்கையாக இருக்க அறிவுறுத்தப்படுகிறார்கள்.

இது ஒரு சாத்தியமான ஷார்ட் சர்க்யூட் எச்சரிக்கையை குறிக்கலாம். ஷார்ட் சர்க்யூட் ஒரு குறிப்பிடத்தக்க ஆபத்தை ஏற்படுத்தும் என்று கூறப்பட்டுள்ளது. ஒருவேளை நீங்கள் பயன்படுத்தும் இயர்பட்ஸ் அல்லது ஸ்மார்ட்போன் அல்லது எந்தவொரு சாதனமாக இருந்தாலும், அதில் நீங்கள் வழக்கத்திற்கு மாறான சூட்டை உணர்கிறீர்கள் என்றால், அதை பயன்படுத்தாமல் தனியாக எடுத்து வைத்து சோதனை செய்வது பாதுகாப்பானது என்று அறிவுரைக்கப்பட்டுள்ளது.