எல்லா PF அக்கவுண்ட்டுக்கும் வந்தது புது ரூல்ஸ்.. ஃபார்ம் 15G, 15H கதை முடிந்தது.. இனி ஒவ்வொரு ஆண்டும்?

இபிஎப்ஓ (EPFO) என்கிற ஊழியர்களின் வருங்கால வைப்பு நிதி அமைப்பு (Employees Provident Fund Organisation) ஆனது வருமான வரிச் சட்டம் 2025-இன் கீழ் ஒரு புதிய இணக்க வழிமுறையை அறிமுகப்படுத்தி உள்ளது. இதன் மூலம், நீண்ட காலமாக பயன்பாட்டில் இருந்த படிவங்கள் 15ஜி மற்றும் 15எச்-க்கு பதிலாக, ஒரே ஒருங்கிணைந்த படிவம் 121 அறிமுகப்படுத்தப்பட்டுள்ளது.

இந்த மாற்றம் ஏற்கனவே நடைமுறைக்கு வந்துவிட்டாலும் இபிஎப்ஓ-வானது இதுகுறித்து தொடர்ச்சியான அறிவிப்பு மற்றும் சுற்றறிக்கையை வெளியிட்டு வருகிறது. இந்த புதிய கட்டமைப்பின் கீழ், டிடிஎஸ் (TDS) செய்வதிலிருந்து விலக்கு கோரும் தனிநபர்களுக்கு, படிவம் 121 ஒரு ஒருங்கிணைந்த சுய அறிவிப்பாக செயல்படுகிறது.

இது, வருமான வரிச் சட்டம், 1961-இன் கீழ் வரி செலுத்துவோரை வயதின் அடிப்படையில் வேறுபடுத்திய முந்தைய இரட்டை படிவ முறைக்கு மாற்றாக வந்துள்ளது. முன்னதாக, 60 வயதுக்குட்பட்ட தனிநபர்கள் படிவம் 15ஜி-ஐயும், 60 மற்றும் அதற்கு மேற்பட்ட வயதுடைய மூத்த குடிமக்கள் படிவம் 15எச்-ஐயும் சமர்ப்பிக்க வேண்டியிருந்தது.

இப்போது, ​​படிவம் 121 வயது வேறுபாடின்றி தகுதியுள்ள அனைத்து தனிநபர்களுக்கும் ஒரே படிவமாக செயல்படுகிறது. இது வயதின் அடிப்படையில் படிவங்களை தேர்ந்தெடுக்க வேண்டிய தேவையை நீக்கி, ஒரு சீரான இணக்க கட்டமைப்பை நிறுவுகிறது. "1961 ஆம் ஆண்டு வருமான வரிச் சட்டம் படிப்படியாக நீக்கப்பட்டு, 2025 ஆம் ஆண்டு வருமான வரிச் சட்டம் நடைமுறைக்கு வருவதால்... முன்னர் இருந்த படிவம் 15ஜி மற்றும் படிவம் 15எச் ஆகியவை, படிவம் 121 என்ற ஒற்றை, ஒருங்கிணைந்த எழுத்துப்பூர்வ அறிவிப்பால் மாற்றப்பட்டுள்ளன" என்று இபிஎப்ஓ மீண்டும் மீண்டும் அறிவித்து வருகிறது.

படிவம் 121 என்றால் என்ன? படிவம் 121 என்பது ஒரு சுய அறிவிப்பாகும். இது தகுதியுள்ள வரி செலுத்துவோர், இபிஎப் திரும்ப பெறுதல்கள் (PF withdrawals), வட்டி (interest), ஈவுத்தொகை (dividends) மற்றும் அதுபோன்ற வருமான வழிகள் மீதான டிடிஎஸ்-ஐ தவிர்க்க அனுமதிக்கிறது.

இந்த படிவத்தை சமர்ப்பிப்பதன் மூலம், தனிநபர்கள் தங்களின் மொத்த ஆண்டு வருமானம் வரி விதிக்கக்கூடிய வரம்பிற்கு கீழே உள்ளது என்பதை உறுதிப்படுத்துகிறார்கள். வயது சார்ந்ததாக இருந்த படிவங்கள் 15ஜி மற்றும் 15எச் போலல்லாமல், படிவம் 121-ஐ வயது வேறுபாடின்றி அனைத்து குடியுரிமை பெற்ற வரி செலுத்துவோரும் தாக்கல் செய்யலாம்.

படிவம் 121 - இதை யார் தாக்கல் செய்யலாம்?
- மூத்த குடிமக்கள் உட்பட, இந்தியாவில் வசிக்கும் தனிநபர்கள்
- இந்து கூட்டு குடும்பங்கள் (Hindu Undivided Families - HUFs)
- அறக்கட்டளைகள் போன்ற சில தகுதியான நிறுவனங்கள் (அவற்றின் வருமானம் வரிவிதிப்பு வரம்பிற்கு குறைவாக இருந்தால்)
- விண்ணப்பதாரர்கள் சம்பந்தப்பட்ட நிதியாண்டில் பூஜ்ஜிய வரிப்பொறுப்பைக் கொண்டிருந்தால்.

படிவம் 121 - முக்கிய அம்சங்கள்:
- இணக்கத்தை எளிதாக்க 15ஜி மற்றும் 15எச் ஆகிய இரண்டிற்கும் பதிலாக வருகிறது
- ரூ. 50,000-க்கு மேல் (அல்லது பான் இணைக்கப்படவில்லை என்றால் இன்னும் அதிகமாக) இபிஎப் திரும்ப பெறுதல்களுக்கான டிடிஎஸ்-ஐ தவிர்க்க உதவுகிறது

- வெளிப்படைத்தன்மைக்காக ஒவ்வொரு சமர்ப்பிப்பும் ஒரு தனித்துவமான அடையாள எண்ணை (UIN) உருவாக்குகிறது
- தகுதியை உறுதிப்படுத்த கடந்த இரண்டு ஆண்டுகளுக்கான ஐடிஆர் (ITR) ஒப்புகை விவரங்கள் தேவை
- வருமான வரித்துறையின் அதிகாரப்பூர்வ இணையதளம் வழியாக அணுகலாம்.

இபிஎப் சந்தாதாரர்களுக்கு என்ன மாற்றங்கள்? ஏப்ரல் 1, 2026 முதல், தகுதியான திரும்ப பெறுதல்கள் அல்லது வட்டி மீதான டிடிஎஸ்-ஐ தவிர்க்க விரும்பினால், இபிஎப் உறுப்பினர்கள் ஒவ்வொரு நிதியாண்டிலும் படிவம் 121-ஐ சமர்ப்பிக்க வேண்டும். படிவத்தை தாக்கல் செய்ய தவறினால், நிர்ணயிக்கப்பட்ட வரம்பிற்கு மேல் திரும்ப் பெறும் தொகைகளுக்கு மூலத்தில் வரி பிடித்தம் செய்யப்படும். இந்த நடவடிக்கை, இணக்கத்தை எளிதாக்குவதையும், குழப்பத்தை குறைப்பதையும் நோக்கமாக கொண்டுள்ளது, குறிப்பாக முன்பு இரண்டு தனித்தனி படிவங்களுக்கு இடையில் தகுதியை தீர்மானிக்க வேண்டியிருந்த வரி செலுத்துவோருக்கு இது உதவும்.

இப்போது நீங்கள் என்ன செய்ய வேண்டும்?
- படிவம் 15ஜி அல்லது 15எச்-க்கு பதிலாக படிவம் 121-ஐ பயன்படுத்தத் தொடங்குங்கள்.
- உங்கள் இபிஎப் பணம் எடுப்புகள் அல்லது வைப்புத்தொகை மீதான வட்டிக்கு வரி விலக்கு பயன்படுத்தப்படுவதை உறுதிசெய்ய, ஒவ்வொரு நிதியாண்டுக்கும் விண்ணப்ப படிவத்தை தாக்கல் செய்வது கட்டாயமாகும்.
- படிவம் தாக்கல் செய்யப்படாவிட்டால், ரூ.50,000-க்கு மேல் எடுக்கப்படும் பணத்திற்கு டிடிஎஸ் பிடித்தம் செய்யப்படும்.