புது ரூல்ஸ்.. பிப்.1 முதல் அமல்.. என்னென்ன பொருட்களின் விலை உயரும், குறையும்?

2026 ஆம் ஆண்டு பிப்ரவரி 1 ஆம் தேதி முதல் பல வகையான புதிய விதிகள் மற்றும் மாற்றங்கள் அமலுக்கு வருகின்றன. இதில் நிதி சார்ந்த விஷயங்களும் உள்ளன, உங்களுடைய அன்றாட வழக்கத்தை பாதிக்கக்கூடிய புதிய விதிகளும் உள்ளன; கூடவே சில பொருட்களின் விலைகளும் அதிகரிக்க உள்ளன. அப்படியாக என்னென்ன மாற்றங்கள் பிப்ரவரி 1 முதல் அமலுக்கு வருகிறது? இதோ விவரங்கள்:

1. பாஸ்டாக் விதிகள் (FASTag New Rules): பிப்ரவரி 1 முதல் அமலுக்கு வரும் புதிய விதிகளின் கீழ் பாஸ்டாக் அமைப்பு எளிமைப்படுத்தப்படும். இந்திய தேசிய நெடுஞ்சாலை ஆணையம் (NHAI) நாளை முதல் அனைத்து புதிய பாஸ்டாக் வெளியீடுகளுக்கும் கார்களுக்கான (கார் / ஜீப் / வேன் வகை பாஸ்டாக்) உங்கள் வாகனத்தை அறிந்து கொள்ளுங்கள் (KYV) செயல்முறையை நிறுத்த முடிவு செய்துள்ளது.

செல்லுபடியாகும் வாகன ஆவணங்களை வைத்திருந்தாலும், பாஸ்டாக் செயல்படுத்தப்பட்ட பிறகு சிரமத்தையும், தாமதத்தையும் சந்தித்த லட்சக்கணக்கான சாலை பயனர்களுக்கு இந்த மாற்றம் பயனளிக்கும் என்று எதிர்பார்க்கப்படுகிறது. ஏற்கனவே கார்களுக்கு வழங்கப்பட்ட பாஸ்டாக்-க்கு, கேஒய்வி இனி வழக்கமான தேவையாக, ஒரு கட்டாயமாக இருக்காது என்று அறிவிக்கப்பட்டுள்ளது

தளர்வான பாஸ்டாக், தவறான பாஸ்டாக் வழங்கல் அல்லது தவறாக பாஸ்டாக் பயன்படுத்துதல் தொடர்பான சிக்கல்கள் போன்ற புகார்கள் பெறப்படும் சந்தர்ப்பங்களில் மட்டுமே கேஒய்வி தேவைப்படும். எந்தவொரு புகாரும் இல்லாத நிலையில், ஏற்கனவே உள்ள கார் பாஸ்டாக்-க்கு கேஒய்வி தேவையில்லை என்று சாலைப் போக்குவரத்து மற்றும் நெடுஞ்சாலைகள் அமைச்சகம் ஒரு அறிக்கையில் தெரிவித்துள்ளது.

2. சிகரெட்டுகள் விலை உயரும் (Cigarette Price Hike): பிப்ரவரி 1 முதல் சிகரெட்டுகள் விலை உயரும் என்று எதிர்பார்க்கப்படுகிறது. ஃபில்டர்கள் மற்றும் லாங்கர் சிகரெட்டுகளுக்கான விலை உயர்வுகளும் அதிகரிக்கும். இந்த மாத தொடக்கத்தில், சிகரெட், ஜர்தா, குட்கா (புகையிலையுடன் கூடிய பான் மசாலா) உள்ளிட்ட புகையிலை பொருட்களுக்கான புதிய வரி விகிதங்களையும், பான் மசாலா (புகையிலை இல்லாமல்) மீதான செஸ் விகிதத்தையும் அரசாங்கம் அறிவித்து இருந்தது இங்கே குறிப்பிடத்தக்கது.

3. எல்பிஜி விலையில் திருத்தம் (LPG price Revision): எல்பிஜி சிலிண்டர் விலைகள் சந்தையால் தீர்மானிக்கப்பட்டு சர்வதேச அளவுகோல்களுடன் இணைக்கப்பட்டுள்ளதால், பிப்ரவரி 1 முதல் திருத்தம் செய்யப்படலாம். வணிக எல்பிஜி விலைகளில் ஏற்படும் மாற்றங்கள் உலகளாவிய எல்பிஜி விலைகள் மற்றும் தொடர்புடைய செலவுகளில் ஏற்படும் மாற்றங்களை பிரதிபலிக்கின்றன என்பது இங்கே குறிப்பிடத்தக்கது.

4. சிஎன்ஜி, பிஎன்ஜி மற்றும் விமான எரிபொருள் கட்டணங்களில் திருத்தம் (Revision in CNG, PNG and Aviation fuel charges): பிப்ரவரி 1 முதல் சிஎன்ஜி, பிஎன்ஜி மற்றும் விமான எரிபொருளின் விலைகள் திருத்தப்படும் என்றும் எதிர்பார்க்கப்படுகிறது. நடைமுறையில் உள்ள விமான எரிபொருள் விலைகளைப் பொறுத்து விமான கட்டணங்கள் உயரலாம் அல்லது குறையலாம்.

5. பட்ஜெட் நாளில் பங்குச் சந்தை திறந்திருக்கும்: மத்திய நிதியமைச்சர் நிர்மலா சீதாராமன் பிப்ரவரி 1 ஆம் தேதி தனது தொடர்ச்சியான ஒன்பதாவது பட்ஜெட்டை தாக்கல் செய்யும்போது, ​​பங்குச் சந்தைகள் திறந்திருக்கும். என்எஸ்இ (NSE) மற்றும் பிஎஸ்இ (BSE) இரண்டும் அவற்றின் வழக்கமான திறந்திருக்கும் நேரங்களில் செயல்படும்.