Amazon வாடிக்கையாளர்களே உஷார்.! பார்சல் டெலிவரி பெயரில் மோசடி - இனி செக் செஞ்சு வாங்குங்க!

அமேசான் தளத்தில் ரெட்மி நோட் 8 ஆர்டர்

கர்நாடகாவில் உள்ள சிக்மகளூரு பகுதியில் வசிக்கும் ஹைதர் அலி என்பவர், கடந்த நான்கு நாட்களுக்கு முன்பு அமேசான் தளத்தின் வழியாக சியோமி ரெட்மி நோட் 8 ஸ்மார்ட்போனை ஆர்டர் செய்திருந்திருக்கிறார். இவருடைய ஆர்டர் நான்கு தினங்களுக்கு முன்பு ஏற்கப்பட்டுக் கடந்த ஞாயிற்றுக்கிழமை டெலிவரியும் செய்யப்பட்டிருக்கிறது. டெலிவரி பார்ட்னர் மூலம் ஹைதர் அலியின் வீட்டிலேயே பார்சல் டெலிவரி செய்யப்பட்டுள்ளது.

அமேசான் டெலிவரி குறித்து சமீபத்தில் பதிவான புகார்கள்

அமேசான் நிறுவனத்தில் ஆர்டர் செய்யும் வாடிக்கையாளர்களுக்கு, நிறுவனம் சில நேரங்களில் தவறுதலான பொருட்களை டெலிவரி செய்கிறது என்றும், இன்னும் சில நேரங்களில் போலியான வணிகர்களிடமிருந்து போலியான பொருட்கள் டெலிவரி செய்யப்படுகிறது என்றும், இன்னும் சிலர் ஏமாற்றப்படுவதாகவும் சமீபத்தில் பல செய்திகள் வெளியாகியுள்ளது. இந்த செய்திகளை ஹைதர் அலியும் படித்திருக்கிறார். ஆகையால் சற்று உஷாராக இருந்திருக்கிறார்.

டெலிவரி பார்ட்னர் முன்னிலையில் பார்சலை ஓபன் செய்த வாடிக்கையாளர்

அமேசான் நிறுவனம் தனது வாடிக்கையாளர்களுக்குப் பொருட்களை டெலிவரி செய்யும் போது, வாடிக்கையாளர்கள் ஏமாற்றப்படும் செயல்களைக் கேள்விப்பட்டேன். எனவே நான் ஆர்டர் செய்த பொருள் எனது கைகளுக்கு டெலிவரி செய்யப்பட்டதும், பார்சல் பெட்டியை டெலிவரி பார்ட்னர் முன்னிலையிலேயே திறந்து பார்த்தேன், அதில் ரெட்மி நோட் 8 ஸ்மார்ட்போனின் டப்பா தான் இருந்தது. இருப்பினும் நான் சாதனம் சரியாக இருக்கிறதா என்று ஆராய்ந்தேன்.

போன் பார்சலில் சோப்பு, உருளைக்கிழங்கு மற்றும் கற்கள்

என்னிடம் ஒப்படைக்கப்பட்ட பார்சலில் ரெட்மி நோட் 8 ஸ்மார்ட்போனின் டப்பா தான் இருந்தது, ஆனால் அதற்குள் ஸ்மார்ட்போன் மட்டுமில்லை. ஸ்மார்ட்போன் எடைக்கு ஏற்றார் போல் பார்சலில் ஒரு சோப்பு, உருளைக்கிழங்கு மற்றும் கற்கள் நிரப்பப்பட்டிருந்தது. பார்சலில் போன் இல்லாமல் உருளைக்கிழங்கு இருப்பதைக் கண்டு அதிர்ந்து போனேன் என்று ஹைதர் அலி கூறியுள்ளார்.

இனி பார்சல் வந்தால் செக் செய்ய மறக்காதீங்க

ஹைதர் அலி அமேசான் தளத்தில் ஆர்டர் செய்த பார்சலில் ரெட்மி நோட் 8 ஸ்மார்ட்போனிற்கு பதிலாக எப்படி உருளைக்கிழங்கு, விம் பார் சோப்பு மற்றும் கற்கள் வந்ததென்று தெரியவில்லை என்று டெலிவரி பார்ட்னர் தெரிவித்திருக்கிறார். ஹைதர் அலி மோசடியை உறுதிப்படுத்திவிட்டு பணம் செலுத்தாமல் டெலிவரி பார்ட்னரை அனுப்பிவிட்டு, சிருங்கேரி காவல்நிலையத்தில் புகார் அளித்துள்ளார். இனி உங்களுக்கு பார்சல் வந்தால் செக் செய்ய மறக்காதீங்க.