வாகன ஓட்டிகளுக்கு குட் நியூஸ்.. நவம்பர் 1 முதல்.. புதிய வருடாந்திர Fastag லோக்கல் பாஸ்.. இதோ முழு விவரம்..

மத்திய சாலைப் போக்குவரத்து மற்றும் நெடுஞ்சாலை அமைச்சகம் புதிய திட்டத்தை அறிமுகம் செய்துள்ளது. அதாவது சுங்கச்சாவடிக்கு அருகில் வசிக்கும் வாகன ஓட்டிகளுக்காக புதிய வருடாந்திர உள்ளூர் (லோக்கல்) பாஸ் திட்டத்தை அறிமுகப்படுத்துகிறது. நவம்பர் 1 முதல் நடைமுறைக்கு வரும் இந்தத் திட்டத்தின் மூலம், தகுதியுள்ள வாகன ஓட்டிகள் ஆண்டுதோறும் சுங்கக் கட்டணத்தில் பணத்தைச் சேமிக்க முடியும். குறிப்பாக, தினமும் ஒரே சுங்கச்சாவடியைக் கடந்து வேலைக்குச் செல்வோர் மற்றும் அடிக்கடி பயணம் செய்வோர் இந்தத் திட்டத்தின் மூலம் பயனடையலாம்.

யாரெல்லாம் புதிய பாஸ் பெறலாம்?

இந்தப் புதிய பாஸைப் பெறுவதற்கு, சம்பந்தப்பட்ட சுங்கச்சாவடியிலிருந்து 20 கி.மீ. சுற்றளவுக்குள் வசிப்பவராக இருக்க வேண்டும். மேலும் வணிக நோக்கமற்ற வாகனங்களின் உரிமையாளர்கள் மட்டுமே இந்தச் சலுகைக்கு விண்ணப்பிக்க முடியும். விண்ணப்பதாரர்களின் வாகனத்துடன் செல்லுபடியாகும் ஃபாஸ்டாக் இணைக்கப்பட்டிருக்க வேண்டும். முகவரிக்கான சான்றுகளையும் தயாராக வைத்திருப்பது அவசியம்.

வருடாந்திர பாஸ் கட்டணம் எவ்வளவு?

சுங்கச்சாவடி அமைந்துள்ள இடத்தைப் பொறுத்து வருடாந்திர பாஸ் கட்டணம் நிர்ணயிக்கப்படுகிறது. சுங்கச்சாவடி நகராட்சி அல்லது உள்ளூர் நகர்ப்புற எல்லைக்கு வெளியே இருந்தால் ரூ.1,500 செலுத்த வேண்டும். அதேசமயம், நகர்ப்புற எல்லைக்குள் அமைந்துள்ள சுங்கச்சாவடிக்கு ரூ.3,000 கட்டணம் நிர்ணயிக்கப்பட்டுள்ளது. எனவே, விண்ணப்பிப்பதற்கு முன்பு தங்களுக்குப் பொருந்தும் கட்டணத்தைத் தெரிந்துகொள்வது முக்கியம்.

ஒரு சுங்கச்சாவடியில் மட்டுமே செல்லுபடியாகும்!

இந்த வருடாந்திர பாஸ் எந்தச் சுங்கச்சாவடிக்காகப் பெறப்படுகிறதோ, அந்தச் சுங்கச்சாவடியில் மட்டுமே செல்லுபடியாகும். இதைப் பயன்படுத்தி மற்ற சுங்கச்சாவடிகளில் இலவசமாகப் பயணம் செய்ய முடியாது. ஒன்றுக்கும் மேற்பட்ட சுங்கச்சாவடிகளைக் கடந்து செல்ல வேண்டியிருந்தால், மற்ற இடங்களுக்கான கட்டணங்களைத் தனியாகச் செலுத்த வேண்டும்.

அனைத்து நெடுஞ்சாலைகளிலும் இந்தச் சலுகை கிடைக்குமா?

இந்தப் புதிய பாஸ் அனைத்து நெடுஞ்சாலைகளுக்கும் பொருந்தாது. நுழையும் இடம் மற்றும் வெளியேறும் இடத்தின் அடிப்படையில் கட்டணம் வசூலிக்கப்படும் சில தேசிய நெடுஞ்சாலைகள் மற்றும் விரைவுச்சாலைகளில் இந்த வசதி கிடைக்காது. எனவே, தினமும் பல சுங்கச்சாவடிகளைக் கடந்து பயணம் செய்பவர்கள் இந்த விதிமுறைகளை முன்கூட்டியே தெரிந்துகொள்ள வேண்டும்.

விண்ணப்பிப்பதற்கு முன்பு கவனிக்க வேண்டியவை!

புதிய பாஸுக்கு விண்ணப்பிக்கும் முன்பு, தங்களது வீடு சம்பந்தப்பட்ட சுங்கச்சாவடியிலிருந்து 20 கி.மீ. சுற்றளவுக்குள் உள்ளதா என்பதை உறுதிப்படுத்த வேண்டும். அதேபோல், ஃபாஸ்டேக் செயலில் உள்ளதா, சரியான வாகனப் பதிவுடன் இணைக்கப்பட்டுள்ளதா என்பதையும் சரிபார்க்க வேண்டும். முகவரிச் சான்று உள்ளிட்ட தேவையான ஆவணங்களையும் தயாராக வைத்திருக்க வேண்டும். மேலும், மத்திய சாலைப் போக்குவரத்து மற்றும் நெடுஞ்சாலை அமைச்சகம் அல்லது தேசிய நெடுஞ்சாலைகள் ஆணையம் வெளியிடும் அதிகாரப்பூர்வ வழிகாட்டுதல்களைப் பின்பற்ற வேண்டும்.

யாருக்கு இந்தத் திட்டம் அதிகம் பயனளிக்கும்?

ஒரே சுங்கச்சாவடியை அடிக்கடி பயன்படுத்தும் உள்ளூர் வாகன ஓட்டிகளுக்கு இந்த வருடாந்திர பாஸ் மூலம் கணிசமான தொகையைச் சேமிக்க முடியும். இருப்பினும், உண்மையான சேமிப்பு சுங்கச்சாவடியின் இருப்பிடம், பாஸ் கட்டணம் மற்றும் பயணங்களின் எண்ணிக்கையைப் பொறுத்து மாறுபடும். எனவே, மாதாந்திர பாஸ் வாங்குவதைவிட வருடாந்திர பாஸ் பெறுவது தங்களுக்கு லாபகரமாக இருக்குமா என்பதைத் தெரிந்துகொண்டு முடிவெடுப்பது நல்லது.