மே 1 முதல் புது EPFO ரூல்ஸ்.. இனி UPI, ATM வழியாக PF பணம்.. முதல் முறை எவ்வளவு எடுக்கலாம்? 100% எப்போது?

புதிய வரம்பு (New Limit) மற்றும் புதிய விதிகளை (New Rules) உள்ளடக்கிய இபிஎப்ஓ (EPFO) சேவைக்கான ஒரு புதிய அமைப்பு (New System) 2026 ஆம் ஆண்டு மே மாதம் முதல் அமலுக்கு வர உள்ளது. அது - இபிஎப்ஓ ​​உறுப்பினர்கள் தங்கள் வருங்கால வைப்பு நிதி (PF) பணத்தை யுபிஐ (UPI) ஆப்கள், ஏடிஎம் (ATM) மூலம் நேரடியாக எடுக்க அனுமதிக்க அமைப்பாகும்.

இந்த அமைப்பின் அறிமுகமானது நீண்ட படிவங்கள் அல்லது எம்பளாயரின் (முதலாளியின்) ஒப்புதல்களின் தேவையை நீக்குகிறது. மேலும் இது தாமதங்களை குறைத்து (குறிப்பாக அவசர காலங்களில்) நிதியை விரைவாக பெறுவதை உறுதி செய்யும். சரிபார்ப்பு மற்றும் செயலாக்க தேவைகள் காரணமாக பணம் எடுக்க பல நாட்கள் ஆகக்கூடிய தற்போதைய செயல்முறையிலிருந்து இது ஒரு பெரிய மாற்றமாகும்.

பணம் எடுப்பதற்கான வரம்புகள்: இருப்பினும், ஓய்வூதிய சேமிப்பை பாதுகாக்க சில வரம்புகள் இருக்கும். உறுப்பினர்கள் தங்கள் பிஎப் இருப்பில் 50-75 சதவீதம் வரை யுபிஐ (UPI) அல்லது ஏடிஎம் (ATM) போன்ற முறைகளை பயன்படுத்தி எடுக்க அனுமதிக்கப்படலாம் என்று அதிகாரிகள் தெரிவித்து உள்ளனர்

நீண்ட கால நிதி பாதுகாப்பை உறுதி செய்ய, கணக்கில் குறைந்தபட்சம் 25 சதவீத இருப்பு இருக்க வேண்டும் என்றும் அறிவிக்கப்பட்டுள்ளது. ஆரம்பத்தில் - குறிப்பாக இந்த புதிய அமைப்பை செயல்படுத்தும் கட்டங்களில், ஒரு பரிவர்த்தனைக்கு சுமார் ரூ.25,000 வரை யுபிஐ மூலம் பணம் எடுப்பதற்கு வரம்பு விதிக்கப்படலாம். இதன் பொருள், யுபிஐ மூலம் பணம் எடுப்பது என்பது முழு தொகையையும் எடுப்பதை விட, விரைவான, சிறிய தேவைகளுக்காகவே முக்கியமாக வடிவமைக்கப்பட்டுள்ளது.

இபிஎப்ஓ 3.0-இன் கீழ் எளிமையாகும் விதிகள்: பிஎப் பணம் எடுக்க முன்பு, பல சிக்கலான விதிகள் இருந்தன, ஆனால் இப்போது, ​​அவை அத்தியாவசிய தேவைகள், வீட்டு வசதி தொடர்பான தேவைகள் மற்றும் சிறப்பு சூழ்நிலைகள் (வேலையின்மை போன்றவை) என மூன்று வகைகளாக பிரிக்கப்படும். இந்த மாற்றம், புரிந்துகொள்வதையும், பயன்படுத்துவதையும் எளிதாக்குவதை நோக்கமாக கொண்டுள்ளது.

அவசர காலங்களில் விரைவான அணுகல்: யுபிஐ-ஐ பயன்படுத்துவதன் மிகப்பெரிய நன்மைகளில் ஒன்று அதன் வேகம். யுபிஐ நிதியை பயன்படுத்தும்போது, ​​ஒப்புதல் கிடைத்தவுடன் கிட்டத்தட்ட உடனடியாக வரவு வைக்கப்படலாம். பெரும்பாலான சந்தர்ப்பங்களில், இபிஎப்ஓ ​​அலுவலகங்களுக்கு செல்ல வேண்டிய அவசியமில்லை மற்றும் எம்பளாயரின் சரிபார்ப்பை சார்ந்திருக்க வேண்டிய அவசியமும் இருக்காது. மருத்துவ அவசரநிலைகள் அல்லது திடீர் நிதி தேவைகள் போன்ற அவசர சூழ்நிலைகளில் இது மிகவும் பயனுள்ளதாக இருக்கும்.

முழுமையாக பணம் எடுப்பதற்கான விதிகள் என்ன? குறிப்பிடத்தக்க வகையில், முழுமையாக பணம் எடுப்பதற்கான விதிகள் மாறாமல் இருப்பதால், யுபிஐ வழியிலான அமைப்பு பகுதியளவு பணம் எடுப்பதற்கு மட்டுமே பொருந்தும். ஓய்வு பெற்ற பிறகு அல்லது வேலையிழப்பு ஏற்பட்டால் நீண்ட கால வேலையின்மைக்கு பிறகு மட்டுமே 100 சதவீதம் பணம் எடுக்க அனுமதிக்கப்படுகிறது. அதே சமயம், பகுதியளவு பணம் எடுப்பதில், ஒரு மாதத்திற்கு பிறகு 75 சதவீதம் வரை எடுக்கலாம்.

இபிஎப்ஓ ​​3.0 என்பது இந்தியாவின் ஓய்வூதிய முறையை நவீனமயமாக்கும் ஒரு பெரிய முயற்சியின் ஒரு பகுதியாகும். யுபிஐ-ஐ ஒருங்கிணைத்து, காகித வேலைகளை குறைப்பதன் மூலம் பிஎப் கணக்குகளை வழக்கமான வங்கி கணக்குகளைப் போலவே செயல்பட வைத்து, அவற்றை மேலும் அணுகக்கூடியதாகவும், நெகிழ்வானதாகவும், திறமையானதாகவும் மாற்ற அரசாங்கம் நம்புகிறது.

இதன் சாராம்சம் என்ன? பிஎப் பணத்தை எடுக்க யுபிஐ-ஐ பயன்படுத்தும் முறை வேகமானதாக மாறி வருகிறது, மேலும் டிஜிட்டல் யுபிஐ நிதியை ஏறக்குறைய உடனடியாக அணுக அனுமதிக்கும். ஆனால், சேமிப்பு முழுமையாக தீர்ந்துவிடாமல் இருப்பதை வரம்புகள் உறுதி செய்கின்றன. சாராம்சத்தில், உங்கள் பணத்தை நீங்கள் விரைவாக அணுகலாம், அதே நேரத்தில் இந்த அமைப்பு உங்கள் ஓய்வூதிய நிதியை தொடர்ந்து பாதுகாக்கும்.