புதிய சாம்சங் கேலக்ஸி எஸ்-3 லண்டனில் அறிமுகம்!

புதிய கேலக்ஸி எஸ்-III ஸ்மார்ட்போனை லண்டனில் அறிமுகம் செய்துள்ளது சாம்சங் நிறுவனம். மொபைல் மார்கெட்டில் பெரிய அளவில் ஹிட் கொடுத்த சாம்சங் எஸ்-2 ஸ்மார்ட்போனை தொடர்ந்து சாம்சங் எஸ்-III ஸ்மார்ட்போன் வெளியாகி உள்ளது.

இந்த ஸ்மார்ட்போனில் ஒரு பிரத்தியேக விஷயம் என்னவென்றால் ட்ராப்பாக்ஸ் நிறுவனம், 50 ஜிபி வரை ஃப்ரீ க்ளவுட் ஸ்டோரேஜ் வசதியினை வழங்கும். இன்னும் சொல்லப்போனால் இந்த ட்ராப்பாக்ஸ் நிறுவனத்தின் க்ளவுடு ஸ்டோரேஜ் வசதி, கூகுள் ட்ரைவ் வசதிக்கு சிறந்த போட்டியை ஏற்படுத்தும் என்று எதிர்பார்க்கப்படுகிறது.

இது மட்டும் அல்லாமல் இந்த ஸ்மார்ட்போனில் எஸ் வாய்ஸ் என்ற புதிய தொழில் நுட்ப வசதியையும் வழங்கும். இந்த ஸ்மார்ட்போன் 4.8 இஞ்ச் பிரம்மாண்ட அமோலெட் தொழில் நுட்பம் கொண்ட தொடுதிரை வசதியை கொடுக்கும்.

இந்த திரையின் மூலம் 1280 X 720 பிக்ஸல் திரை துல்லியத்தினையும் பெறலாம். ஆன்ட்ராய்டு 4.0 ஐஸ் கிரீம் சான்ட்விச் ஆப்பரேட்டிங் சிஸ்டத்தின் மூலம் அட்டகாசமான தொழில் நுட்ப வசதியினை கொடுத்து அசத்தும் இந்த ஸ்மார்ட்போன், குவாட் கோர் மைக்ரோ பிராசஸரையும் கொண்டது.

சாம்சங் எஸ், சாம்சங் எஸ்-2 ஸ்மார்ட்போன்களையும் விட எல்லா விதத்திலும் உயர்ந்த தொழில் நுட்பத்தினை தான் சாம்சங் கேலக்ஸி எஸ்-3 ஸ்மார்ட்போன் வழங்கும். டியூவல் கேமராவினை கொண்டு கலக்கலான புகைப்படத்தினை கொடுக்கும் இந்த ஸ்மார்ட்போன் 8 மெகா பிக்ஸல் கேமராவினையும், 1.9 மெகா பிக்ஸல் முகப்பு கேமராவினையும் கொடுக்கும்.

சாம்சங் கேலக்ஸி எஸ்-3 ஸ்மார்ட்போனில் 16 ஜிபி, 32 ஜிபி மற்றும் 64 ஜிபி என்று இதில் மூன்று மாடல்கள் உள்ளன. இதன் மெமரி வசதியினை பொருத்து, இந்த ஸ்மார்ட்போனின் விலையும் மாறுபடும் என்று எதிர்பார்க்கப்படுகிறது.

இந்த சாம்சங் எஸ்-3 ஸ்மார்ட்போன் வருகிற மே மாதம் 29-ஆம் தேதி ஐரோப்பா மார்கெட்டில் வெளியாகும் என்று தகவல்கள் கூறுகின்றன. ஆனால் இது பற்றிய விவரங்கள் இன்னும் சரிவர வெளியாகவில்லை.